Chung siar/arsi hla

Thangvan sang siar lungduh leng rualte, Tual an leng van zawla'n; Thlir ka bang dawn lo, khua ka tlai awm e, Hal lote'n tual an leng e. Lungrual kima laitual kan len lai, Saikhaw-tlang chhawrthla eng hnuaiah; Nghilh ni awm thei hian ka ring nem maw? Khuarei kum sul vei mahse. An sakhming reng khi a mawi kher mang e, Hrangchhuan, sikawikap, chawngmawi; Nufa thembu inchuh, dingdi puantah nen, Zangkhua, Hrangkhupa se bawp. Hril zelin - chhohreivung, chung sirawkuai, Chhawrthla, Lalruanga se kawi; Sichakai, siruk, sidawnkawi, turni, Simeitalh, sirairawkherh. Sikeisen, simeikhu, Pu Kula thang, Varparh arsi, hmar arsi; Khiangte zawngzim, thlasik lamtluang chenin, Lungmawla'n a hril seng lo. He lei hringnun hian a dawn seng lo ve, Chatuan Pa thilthlawnpek hlu; Zan khawhar piallei thim tieng mai hian, Khuanu lengin a siam lo'ng. Hringnun iang siar lungrual leng zawng hian, Anka biahthu dam diaiin; Lei-mi leng tawna'n hmangaihna thuchah, An hrilh zan khaw tlaivarin.