Ka pa

Phuahtu: Zoremi Hmar Satu: Cindy Lalthanpuii Khuanu malsawma lo piangin, Hlimte'n chun leh zua ka bel; Hmangaihnaa min chawi lianin, Tu dang reng ka ngai bik lo. Mahse, awmlai nunrawng lo hrangin, Ka zuapa vullai a thliak e; Pawm thiam a har ngei, hrilh ka hai, I hrai riang lungmawl mai hi, Engtin nge maw i tello chuan, Hringnun ka hman tak ang le? Lenrual zingah ka awm laiin, Ka hlim ve emaw an ti thin; Ka pa ngaia ka tah mittui, Ka lungngaihna an hmu lo; Theih chang ve mai se, Ka pa hmangaihna min hlan zawng te hi, Rul seng dawn lo mah ila, Ka theihtawk hlan che ka nuam. Fam i chan hnu hian ka pa, Chunnu'n luaithli a nul bang lo; Hnem dan ka thiam lo, hrilh ka hai, Nang lo chuan kan hnem zo lo. Min rawn thlir ve rawh ka pa, I thai leh hrailengte hi; Nangmah ngaiin kan tap e, Kan ngai che, aw, kan ngai em a che. Nangmah ngaiin kan tap e, Kan ngai che, aw, kan ngai em a che. Kan ngai che, aw, kan ngai che a pa.