Ka lo ruih em vang a lo ni

Mapui, kan inthen lai khan e, zu ka in lo ka tih kha, Mahse, kha tih lai te pawh khan ka rui reng sia; Mapui, luaithlinul chunga e, in run lam haw tura Pheilai i han vawr lai te khan, ka lo ruih em vang a lo ni. Min ngaidam rawh, Mapui, thiamna reng nei lo val hi, Min ngaidam rawh, Mapui, lunglem reng reng ka nei lo; Ih maw, keimah vang khan maw, suihlungphang reng reng a, Zanmu i chhin loh lai te khan, ka lo ruih em vang a lo ni. Mapui, lam ang let leh hian e, ka run lo lawi leh la, Chuti'n ka nun ka sim tawh ang hlimte'n i len ve nan; Tia, ka lo dawn thin te a thlawn mai an chang ta, Mahse, engdang vang a ni lo, ka lo ruih em vang a lo ni. Aw, hun zamual liam tawh te kha kohkir theih chang se maw, Chuti'n nang nen suihlungrualin runhmun leng leh ila; Sam ang then zai rel lo hian e, hringnun kan hmang dun tur, Mahse, ngaiin au mah ila, a thlawn mai mai an chang ta. Hringmi tan doral lian ningzu, engah ka tawn kher che, Ka thai duhlai min thentirtu, nunrawng chawltui ningzu; Chunnu, zua leh chinlai unau sam ang inthentirtu, Lanu, val nun hersualtirtu lu ti hai mai i lo ni.