Kumtluang

Hetah ka awm, i kianga hi, Muangte'n zan mu chhing tawh la; Lungkham buaina zawng te nghilh la, Ka awmah i lu rawn nghat la, Mangchhia a ni, ka hliam lo'ng che, Ka duhlai, ka pangpar i ni, Ka thliah phal loh pangpar mawi chu, Thlipuiah pawh ka hum thin chu. Kan hun liam tawh chung te ka dawnin, Chhingmittui i far tir e; Ka tan i inpekna te, i tawrhna te, Ka phu lo, aw, ka phu mawlh lo, I tan natna thlentu mai ka ni, Pangpar hling nei iang, Di duhlai, eng vang nge, Nat huama kei min hnaih mai le? Damchhung i kianga hman ka nuam, Nang paw'n i hnial lo ka hria; Mahse, duhlai, lo ngaithla la, Kumtluang tiamin rinawm tiam mah ila, Damchhung hman dun inhuam dun mah ila, Khuanu'n a rem lo a tih chuan tih theih a awm lo ve, Chhumpui piah lamah chuan hmun nuam awm se, Thangvan hnuaiah hmuh hmaih ram nuam awm se, Tun damchhung hunah a rem lo a nih chuan, Chutah chuan kan rauthlaleng tal pawh intawng leh se. Hetiang renga hmangaih min tawn tirtu hian, Min then hran hlen ka ring lo ve; Khawi hmunah emaw eng hunah emaw, Min tawn leh che ka ring mang e. Kumtluang tiamin rinawm tiam mah ila, Damchhung hman dun inhuam dun mah ila, Khuanu'n a rem lo a tih chuan tih theih ka nei lo ve, Chhumpui piah lamah sawn hmun nuam awm se, Thangvan hnuaiah hmuh hmaih ram nuam awm se, Tun damchhung hunah a rem lo a nih chuan, Chutah chuan kan rauthlaleng tal pawh intawng leh se, Khawi hmunah emaw eng hunah emaw intawng leh ang aw.