Naktuka fam tur ni ila

Naktuka fam tur ni ila Ka hringnun hi ka thlir kir ang Ka tih ṭhat aiin tih sual A tam zawk hle a ni Tih pawm chungin Ka liam a ṭul ang a Fam turin hringnun kan chhiar Inrin tik ni awm lo hian Mihring nunna hi hluin Zahawm hle mah se Hringnun erawh A ho teh thlawt mang e! Naktuka fam tur ni ila Thih hnu khawvel ka thlir ang a Ka rinna leh ka belh hi A dik a nih ngai chuan Chatuan ramah Muangin ka leng ang a Mahse Rinna hi chu Rinthu mai mai a ni a Thawnthu leh Rinthu vanga Kan innghirngho ṭhinna Hringnun ram hi Ka vui liam tawh ang a Naktuka fam tur ni ila Ka hmelhmate ka thlir ang a Phupa aiin ngaihdamna A ropui zawk tih hi Ka vawng ang a Ngaihdam ka thlang ang a Huatna nen hringnun chhiar chu Dam chhan a awm lo mang e Tia hmangaihna hlutzia Ka chhiar thiam hun meuh chuan Ka hringnun hi Vui liam a hun tawh ang Naktuka fam tur ni ila Ka lainate ka thlir ang a Ka nu mittui hul lo leh Ka pa pachan tumzia ka ngaihruat hian Dam belh ka dil duh ang Ka ṭhianten min ngaih vangin Thil ṭul leh ṭul lo an ti ang Mahse thihna hmachhawna a famate ai chuan A damte hian khawhar kan tuar zawk si