Pathian hmangaihna (Faktu)

Phuahtu: Mary Lalfakawmi Satu: Faktu Pathian hmangaihna ka hriatin, Lawm avangin biangah mittui a luang fo thin; A hmela damna ka thlirin ka thla chau a hahdam thin, A famkim a ka hriat hunah chuan, Ka lawmna hian tawp chin a nei lo vang, Aw, chu hun lo thleng tur ka dawn chang hian, Lei nun thlawhkhumin A kianga len ka nuam. Van thuam ropui kan sin ve theih nan, Ranthlengah tlawmna puan a rawn sin, Lallukhum kan khum ve theih nan, Hlinglukhum a rawn khum a, Chatuan nun kan neih theih nan, Lei leh van lal meuh chuan a nun min hlan, Tiang em a hmangaihna sawifiah sen rual a ni lo ve. Keini hringfa suala bo hnu, Natna tinreng leh sualin a hliam fo thinte; Min tlanchhuah theihna turin maw, A taksa, thisen thianghlim, Sual nei lo leh bawhhlawh kai lo chuan, Kraws lerah thiin min chhandam ta si, Thildang reng kan tan hian a ngai tawh lo, Rilru, taksa, thlarau dam nan a tawk a ni. Ahmaah chhuan tur kan nei lo, Pathian hmangaihna chuan ramri a nei si lo; Thlen phak lohna reng a nei lo, Lei danin thiam lo mahla, Hmangaihna chuan a tuam dam duh che, Nun kan neih nan mifel famkim chu, Khawvel hian thiamloh a chantir asin, Aw, min hmangaihna a va ropui em! Van thuam ropui kan sin ve theih nan, Ranthlengah tlawmna puan a rawn sin, Lallukhum kan khum ve theih nan, Hlinglukhum a rawn khum a, Chatuan nun kan neih theih nan, Lei leh van lal meuh chuan a nun min hlan, Tiang em a hmangaihna sawifiah sen rual a ni lo ve, Tiang em a hmangaihna sawifiah sen rual a ni lo ve.